یوم پاکستان کے موقع پر دارالحکومت تہران میں ایران کے مشہور آزادی ٹاور کو سبز ہلالی پرچم کے رنگوں سے روشن کیا گیا۔
ایران میں پاکستان کے سفیر محمد مدثر ٹیپو نے آزادی ٹاور میں تقریب میں شرکت کی جہاں یوم پاکستان اور نوروز کے تہوار کی ویڈیو میپنگ کی گئی۔
پاکستان ایران تعلقات کی تاریخ میں پہلی بار اس طرح کی ویڈیو میپنگ دکھائی گئی ہے۔ روایتی باجوں کی دھنوں کے ساتھ پاکستان کی قومی یادگاروں کی تصاویر بھی آویزاں کی گئیں اور دونوں ممالک کے قومی ترانے بجائے گئے۔
دونوں پڑوسی ممالک کے درمیان قریبی اور برادرانہ تعلقات کو ظاہر کرنے کے لیے پاکستان کے قومی پرچم کو ایرانی پرچم کے ساتھ روشن کیا گیا۔ پاکستانی اور ایرانی عوام کی بڑی تعداد نے اس تقریب سے لطف اندوز ہوئے۔
سفیر مدثر ٹیپو نے کہا کہ اس طرح کے مواقع لوگوں اور ثقافتوں کے درمیان روابط کو مضبوط بنانے میں مدد دیتے ہیں، یہ دونوں برادر ممالک کے درمیان ثقافت، تاریخ اور روایات کے درمیان تعلقات کا ایک تاریخی لمحہ ہے۔
